نشرت "المدى" قبل أيام ومن خلال صفحاتها وإعلاناتها الطرقية التي انتشرت في أغلب شوارع بغداد الرئيسة عن قرب وصول عدد من المشاهير إلى بغداد، أمثال الملكة إليزابيث وفيروز وزها حديد وميسي وياني وشاكيرا،  ووصلت إلى موقع "المدى الالكتروني" آلاف التعليقات التي اغلبها تسأل عن مدى صحة هذه الإعلانات وهل فعلا سيأتي اليوم الذي يشاهدون فيه هؤلاء المشاهير وقد وطأت أقدامهم ارض بغداد؟

"زينب الجاف" تمنت في تعليقها أن ترى (ياني) يعزف في بغداد إذ قالت: "ياااااااااااااريت ياني يجي امنيتي اشوفه يعزف كدامي بس لا تخلونه نحلم".
اما ورود الساعدي فجاء في تعليقها "بلله كلهم يجون بيها مجال بس ياني شيجيبه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟"

متحف للشمع
وعلق علي الموسوي على مجيء المشاهير إلى بغداد في ظل هذه الظروف بالقول: "عود خلي يسوون منع تجول للسيارات ههههههههههه".
أما احمد حلمي عبد الجبار فتكهن انه سيقام متحف من الشمع لهم إذ علق بالقول: "شباب راح يسوون متحف مال شمع بيه كل الشخصيات المشهورة بالعالم تره مو صدك يجيبوهم هههههه".
وتمنى جواد التميمي ان يرى فقط زها حديد وياني فجاء تعليقه: اريد اشوف زها حديد وياني.
وتساءل حمزة محمد "صدق شباب شنو هاي منو يعرف؟ اتمنى الصفحة توضح أكثر لان دخت آني".
صهيب العبدلي قال: "ماكو شي صعب على العراقيين".
علي القيسي اكد من خلال تعليقه:  "اذا اجه ميسي تصير حرب عالمية 3 هههههه".
وقال أمير ممازحاً "لا شباب فقط ياني راح يجي لأن نصرت البدر يريد يعدل لحن أغنية هسه يجي على النار ههههههههههههههههههه".
وتساءل محمد المختار:" ميسي وياني وملكة بريطانيا عافو الدنيا كلها ويجون على بغداد؟"
عمر استلهم تعليقه من عادل إمام في مسرحية (الزعيم) فقال:  "الملكة إليزابيث؟؟؟!!! الله سابت الجيوش والمماليك والانكليز وتجي لبغداد ؟"
ناصر سالم قال: "ميسي إذا شاف عبوة يراوغها".
أوس حفزه الخبر للعودة إلى بغداد فقال: "كعدوا راحة لاتخلوني ارجع لبغداد هسه".
محمد اكد الخبر فقال بتعليقه: لا صحيح حيجيبون ميسي بمكان يونس محمود والملكة إليزابيث بمكان مها الدوري وياني بمكان ضياء الميالي وشاكيرا بمكان زيزو الاصيل وفيروز ضايجه من لبنان اجت تغير جو وزها حديد اجت تشوف مشاريع بغداد العملاقة طبعا هذا كله بفضل الحكومة الله يديمها فوك راسنا.
Sarmad: شكلها دعاية مثلاً رح يسوون حذاء ماركة ميسي وينزل لأسواق بغداد.
مرحباً بهم (يمكن يحلون مشاكلنا)
سي السيد قلل من اهمية مجيئهم إلى بغداد فقال: يلا عاد واذا اجو قابل راح يحلون مسألة الخدمات لو الفساد لو الازدحامات لو التحاصص وأضاف: "بالنسبة للحجية إليزابيث شبيكم مستغربين, المرة جايه تعالج عدها عرج النسه وهذا ميعالجونه إلا بالكاظميه اباب الدروازه خخخخخخخخخ".
منعم الصالحي قال: "اي صدك ميسي راح يفتح المول اللي سوته الحكومة وفيروز راح تفتتح الجسر الجديد والبقية يمكن راح يسوها مفاجأة..........؟؟؟؟
يسر الربيعي قالت:  "إي صح شباب اكو هيج خبر بس ما صدكنا".
هيثم تساءل: "شنو السبب ليش ووين؟"
اما علي الظفيري فاستغرب مجيء ميسي لبغداد فقال: "مسي يجي لبغداد ههههههههه شر البليه مايضحك".
محمد قال:  "ديالله على اساس بغداد هسه اجمل مدينة سياحية بالشرق الاوسط , بس ديسوولهم تماثيل شمع لهذولة الشخصيات لا اكثر ولا اقل!"
اما عمار فقال مستغرباً: فيروز وشاكيرا وياني يجون لبغداد؟ مو زحمة شوية؟
"لو هسة شهر نيسان جان كلنة كذبة نيسان. اكو لغز بالموضوع؟" بهذا التعليق شارك مصطفى.
اما ايتن فاستبعدت مجيء المشاهير واعتبرتها من المستحيلات فقالت: هذولة لو يكتبون العراق باسمهم ميجون للعراق.
احمد النصراوي قال: يردن يسون دعاية سياحية لبغداد...
وتنتظر امل الزبيدي تأكيد الخبر فقالت :"خلي نشوف ان غدا لناظره قريب من يجون يله نصدق".
اما مهند جابر فعلق متعجبا: شبيكم مستغربين!!! أي راح يجون علمود يثبتون للعالم انو بغداد بخير والسياحة راح ترجع وانتو ان شاء الله على واهسهم هم ترجعون.
علي سعدي استحال مجيئهم: المفروض يكتبون مستحيلا  في بغداد مو قريبا في بغداد.
ورحبت علا كاظم بمجيء المشاهير من خلال تعليقها فقالت: طبعااا هلا بيهم .. بس ليش كل هذا الاستغراب عااادي يعني شنووو حرااام يجون لبغداد؟؟؟!!!!

ليس غريباً مجيئهم ..
ولم يستغرب حيدر رائد ان يرى المشاهير في بغداد فقال:  "مااعتقد شي غريب او مستحيل كلنا شاهدنا انجلينا جولي كيف اتت الى بغداد ومع العوائل العراقية وفي مبنى وزارة الخارجية في قلب بغداد... بالنسبة لزها حديد فهي مهندسة عراقية والمشرفة على تصميم مبنى البنك المركزي الجديد (لا غريب في حضورها بغداد).. بالنسبة لفيروز فهي مطربة لبنانية والكثير من المطربين اللبنانيين أتوا الى بغداد مثل ميريام فارس ومادلين طبر وعاصي الحلاني ونجوى كرم وفارس كرم وآخرين، شاكيرا ايضا مطربة عالمية ولا غرابة في حضورها بغداد.. ميسي نجم الكرة العالمية هو سفير للامم المتحدة وقد زار بلدانا افريقية تعيسة بكل ما تحمله الكلمة من معنى وحتى انه زار فلسطين في فترة سابقة فأين الغرابة إذا حضر ميسي يوم واحد لبغداد!!"" وأضاف: "بالنسبة للملكة إليزابيث ملكة بريطانيا فالجيش البريطاني سبق وان كان موجودا في العراق وهنالك نية حسب ما أعلن الفاتيكان ان بابا الفاتيكان سيزور العراق ويزور مدينة ذي قار تحديدا مهد سيدنا ابراهيم عليه السلام فاين الغرابة اذا حضرت الملكة خصوصا ان بغداد استقبلت امين عام الامم المتحدة والكثير من القادة والرؤساء!!"
الرسام ساهر عدها خطوة جميلة اذ قال "اليوم فتت من يم هاي اللافتات وقريتها ... كلش خطوة حلوة".
وخمنت عبير ان يكون لهؤلاء متحف في بغداد فقالت: "متحف الشمع في بغداد أكيييد ..هلا والله !"
ياسر العبيدي قال: "والله يالله ..فوك ميكلون بلد رجع استعاد عافيته ....والدول كاموا يجون يمنا تكلي شعدهم هنا ديشربون جاي ويرجعون".

حلم صعب المنال
أما في تعليق سعد علي فقد جاء: "يله خلي يتحضرون العصابات إلي راح أتطلعهم الحكومة من السجون حتى يخطفوهم خوش مبلغ".
علي فرج استبعد الخبر فقال: "اخاف صدكتو ... همه اهل العراق ديطلعون منه".
عمر البياتي اعتبر ذلك حلما صعب المنال فقال: "تحلم ياعراق وتتمنى تتحقق احلامك جنت باب الامان وهسه تستجدي امانك تحلم ياعراق وتتمنى تتحقق أحلامك ...
وتساءل نوار أبو فهد عن صحة الخبر فقال: رحم على والديكم كوكب الشرق ام كلثوم وياهم لان ابني عمره 5 اشهر خابصني ايروج للحفلة مال ام كلثوم.
ورد عليه كاسيا الخزرجي بالقول:  لا اله الا الله --- شلون اتوفت وراح تجي - ويكولون زمن المعجزات ولى هههههههههه.