هذا القضاء العراقي المتعفرت على الناس. ما الذي فعله؟ يأكل ويشرب ويقبض وينام ويعطي اذنه الطرشاء للمرجعية ولكم ولنا ولكل مَن في الأرض والسماء. يا عمّ يا قضاءُ جزنا من العنب ونريد سلّتنا. زين هوّه يعرف ما هي سلّتنا؟ أوكي، لا تعطينا أسماء الفاسدين بطّلنا. طيب أصدر لنا قائمة بأسماء النزهاء حتى نشوف حظنا الأسود بيا سلّة نايم. فعلا اذا ماكو قائمة بأسماء الفاسدين فقطعا هناك أخرى بغير الفاسدين، دطلّعها شمتاني؟
هذا القضاء الشايل خشمه بحيث ملايين العراقيين يصيحون الغوث من جور الفاسدين ولا يدير بال، عليه ان يخرج عن صمته ان كان عادلا، كما يدَّعي ليقول لنا، واحدة من اثنتين: أما ان الشعب يكذب بشكواه أو انه صادق. فان كان كاذبا هنا يستحق العقاب بتهمة التلفيق والتدليس. أما إذا كان الشعب صادقا فبماذا نفسر احتقار القضاء للشعب؟
أليس أساس العدل ان البيّنة على مَن ادّعى يا سيادة مدحت المحمود؟ دفك بابك العالي حتى نراويك بيّناتنا. سأريك انا شخصيا كم جاراً لي كان يقتات على مساعدات العاطلين عن العمل بلندن        وبعدماصار مسؤولا أصبح لا يرتضي العيش Yإلا في أبراج مبّرجة؟ تعال وشوف نسوانهم وأولادهم واراويك صورهم قبل وهسه؟
هذا القضاء المغلّس حتى عن الذي يعترف على نفسه وعلى غيره شايفينه شلون يتكلم؟ الصلافة ان وصلت للقضاء فكيف لا يقابل الفاسدون الشعب بعين صلفة؟

هل تريد شاهدا يا أستاذ مدحت على ان الساسة فاسدون؟ شنو رأيك بالمرجعية العليا؟ هل سمعت شهادتها ام لم تسمع؟ لو بس اعرف انت وجماعتك يوم الجمعة وين ترحون، لارتحت؟
زين خلي اجي وياك وأقول ذوله ما يحبونك. زين شنو رأيك بشهادة حبيب قلبك المالكي؟ ألم يقلها علنا بأنه يمتلك ملفات فساد على الجميع؟ دروحله وجيب سلتنا منّه والعنب خليه اله والك. ألست انت بنفسك طيّرت السلة من قائمة إياد علاوي يوم فازت بأعلى عدد المقاعد بالبرلمان قبل كم عام واعطيتها للمالكي تاركا علاوي بطرك العنب الذي بعدين طلع حامض كل خير ما بيه؟
أعرف ان الصخر لو أجابني ستجيب.